Liebä Mitbürger*innen ond Steuerzahler*innen,

die Schuldebremse isch doch a richtigs Meischterwerk!

Es isch doch wunderba, dass mir uns ned mit so übaflüssigem Zeug wie Klima, Bildung ond Schule, Gsundheitssystem oda gar d’Infrastruktur rumschlage müsse.
Haubtsach, d’Wirtschaft läufd – oda hald a ned? Mir bleibet schee uff unserm Geldsäckle hocke. Mir simmer richtig sparsam, wie sich’s ghert. Des ghört sich so, odr?
Mir henn ja bloß no die paar Euro, von dene’s seit Jahr heißt, sie wärad no do. Wia soll mer do noch an d’Zukunft von dr Welt oda unserm Land denke? Mir müsse schließlich für d’Jugend spare. Die wern uns no dankbar sei, wenn se koi Schulde hän.

Gege d’Schlaglöcha gibt’s än SUV, gell. Ond Kinder brauche schließlich koi Bildung – sie solle ja sowieso ned selba denke. Ond Brücke? Wozu? Solled d’Leit hald dahoim bleibä.
Klima isch dotal übabewerted. Wenn’s heiß wird, schiebe ma hald d’Fenschter auf – ond scho isch des Problem gelösd. Ond am Sozialstaat lässt sich am beschde spare. Die hän sowieso koi Lobby. Do geht no viel meh – ond noch viel meh.

Wenn’sne ned passd, könne se ja a Formular ausfülle. Irgendwer wird’s vielleichd, evenduell lese. Ah siehsch – do hämmer doch ebbes, des richdig gut funkzionierd: d’Bürokradie. Die regeld des scho, wie von selbschd – irgendwann oda so.

Es isch wie en großer Ausleseprozess. Nur die Härtste kommet durch! Oda die, wo gnug Geld im Däschle hän. So a Sparprogramm isch doch eigentlich a ganz natürlicher Schutz – vor allem davor, dass jemand wirklich glücklich ond zufrieden wird. Zufriedenheit? Des macht doch nur verdächtig.

Mir fordere daher: no meh Bremse! Schuldebremse, Zukunfdsbremse, Menscheverstandsbremse – brems mer ons erfolgreich zrück in d’Steinzeid!

Es lebe dr Fortschrid … äh, nö: dr Rückschrid.

Mid meinem bremsende Daumen hoch,
eure Cheeny Klingele